'2009

பிறந்தநாள் வாழ்த்துக்கள் - நிலாக்காலம் !!
அனைவருக்கும் இனிய புத்தாண்டு நல்வாழ்த்துக்கள் :-)

...

உள்ளங்கைக்குள் உறங்கட்டும்

என் காதல் ...

என்றேனும்

ஒற்றை பற்றுதலில்

முழுவதுமாய்

நீ உணரக்கூடும் ...

இருத்தல்

பத்திரமாய் படிந்திருக்கிறது 

பட்டாம்பூச்சியின் வண்ணங்கள் 

பழுப்பேறிய நோட்டுப்பக்கங்களில் 

இதுவே போதுமானது 

உயிரைப்பிழியும் என் தனிமையை 

வரைதலில் எடுத்துரைக்க 

ஜன்னல் கண்ணாடியில் 

மங்கிய வெளிச்சத்தில் 

எனதென ஊகிக்ககூடியதாய் 

ஒரு பிம்பம் 

அனுமதிப்பதில்லை 

தனிமைக்கான என் சித்திரத்தை 

தனிமையிலேனும் 

உண்டாகிறது 

எனக்கான என் இருத்தல் 

 

 

திரையாலாகுவது ...

மெல்லியதொரு திரைச்சீலை

நம்மிடையே

அவசியப்படுகிறது

அநேகக் காரணங்கள்

அதற்கானதாய்

என்னிடத்தில்

உன் விழிகளின் வசீகரம்

என்னை விழுங்கிடாதிருக்கவும்

சுவாசத்தின் வெம்மைதனில்

நெகிழ்ந்து இளகாதிருக்கவும்

சிநேகத்தின் பரஸ்பரங்களில்

சிதறுண்டு போகாமலிருக்கவும்

இன்னும்

இனியும்

எத்தனையோ அத்தனையும்

எனைப் பத்திரப்படுத்த

எப்பொழுதேனும்

இதனில் என்னை

முழுவதுமாய் வாரிச்சுருட்டி

உன் உள்ளங்கைக்குள்

பொதிந்து வைக்கவும் ஆகிறது ...

உன் விரல் பிடித்துக் கொள்கிறேன் ...

உன் விரல் பிடித்துக் கொள்கிறேன்

அனிச்சையாய் ..

இருள் படர

ஆயத்தமாகும் பொழுது

வகைபிரிக்க முடியாத உணர்வு

இருட்டில் பயணிப்பதென்பது

பயமாகவும் இருக்கலாம்

தைரியக்குறைவாகவும் இருக்கலாம்

ஆராய விருப்பமில்லாது

உன் விரல் பிடித்துக்கொள்கிறேன்

உறுதியளிக்க முடியாது தான்

உன் பாதைகளின் தன்மை குறித்து

இருளைக் காட்டிலும்

மோசமான தாக்கத்தை

நீ என்னில் ஏற்படுத்தலாம்

எனினும் உன் விரல் பிடித்துக்கொள்கிறேன்

என்னென்னவோ காரணங்களை

எனக்கு நானே கற்பித்துக் கொண்டு

உன் விரல் பிடித்துக்கொள்கிறேன்

இருட்டிலே

கொஞ்சம் கொஞ்சமாய்

என் சுயத்தின் சிதைவுகள் தென்படக்கூடும் ..

கொஞ்சம் உயிரும் ..... காதலென சொல்லப்படுவதும்

உயிரின் கடைசி துகள்கள்
என்னை நீங்கத் தீர்மானித்த பொழுதில்
காற்றின் கரங்களை பற்றிக்கொண்டு
காலத்தின் கைபிடிக்குள் சிக்காது மீட்டு
மலைமுகட்டில் ஒரு கழுகுக்
கூட்டை என் இருபிடமாக்கினாய்

புள்ளியாய் மட்டுமே நீ தோன்றக் கூடிய தொலைவில்
புறப்படத் துவங்கிற்று என் பிரியத்தின் பிரவாகம்

உன் சுவாசத்தின் நெடி அறிய
புழுவாய் நெளிந்து நெருங்கவே
பறந்து விலகி உனக்கான தாகம் கூட்டினாய்

உன் நெருக்கத்தின் வெம்மை கிடைக்காது போயினும்
உன்னைப் பற்றிய அனுமானங்களோடு
பயணிக்கத் துவங்கினேன்
காதலின் ஆபத்தான பள்ளங்களில்

அறிவிப்பற்ற மழையாய் நீ என்னை
நனைக்கத் தொடங்கிய பொழுதில்
உனக்கான தாகம் வற்றத் துவங்கி
உன் இருத்தலை பெருந்துயராக்கிப் போனது

உன்னைகாட்டிலும் போலியானது
என் காதலை கொழுத்து வளரவிட்ட
உன்னைபற்றியதான என் அனுமானங்கள்

என் அனுமானங்களுக்கு
உயிர் இருந்திருக்கலாம்
நான் மிஞ்சி இருக்ககூடும் ..

அழகாய் இருக்கிறாய் ... பயமாய் இருக்கிறது ;)

நீ பகிர்ந்து கொண்ட மௌனங்கள்
எழுதப்படாத கவிதையாய் என்னுள்..

************************************

விழிகள் மொழிபெயர்க்கும்
உயிர் குடிக்கும் உன் மௌனத்தை ..

******************************

கடந்த யுகங்களில் தொலைத்த காதலை
கண்டெடுத்தேன் உன் கருவிழிக்குள் ...

******************************

உன்னிடம் பேசாத பொழுதுகள் ..

உன்னைப் பற்றியே பேசுகின்றன

(தொடரும்..)

....

கண்கள் இறுக்கி
கொஞ்சமேனும் மூச்சடக்கி
ஆலம் விழுதைப் பற்றி
காற்றோடு பயணிக்கும் உற்சாகத்தை
உள்ளங்கை உராய்தலுக்கு அஞ்சி
தவறவிட்டதுண்டு ...

தேடல்...

அறியாமலே விட்டுச்செல்கிறது

ஒவ்வொரு நனைதலும்

பிறிதொரு மழைக்கான தேடலை ......

நிறங்கள் கசியும் பூக்கள்

நொடிப்பொழுதேனும் இமைக்காமல்

பார்க்குமாறு செய்துவிடுகிறது

நிறங்கள் கசியும் பூக்கள்

அருகில் சென்று வாசம் நுகர்வதை

அவை ஆட்சேபிப்பதில்லை

தொட்டுத்தடவி மென்மை ரசிப்பதை

கொஞ்சமேனும் மறுப்பதில்லை

பறிக்கப்படுகிற தருணங்களில் அதன்

பலவீனம் மட்டுமே புலப்படுகிறது

வலுவற்ற வஸ்துக்களை அணுகுவது

எளிதானதாக இருக்கிறது

சூரியன்

எப்பொழுதும் எங்கிருந்தோ

பிரகாசித்துக்கொண்டு இருக்கிறது ...