...

இவ்வறைக்குள் 
திணறும் சுவாசத்தை 
இந்த ஜன்னல் வழியாக 
எங்கேயனுப்பலாம் ?

மஸ்ய ராணி

நீளும் என் இரவுகள்
ஒரு கண்ணாடி ஜாடிக்குள் 
சமுத்திரமென
சஞ்சரிக்கையில்
மஸ்ய ராணியாய்
சயனித்திருக்கிறேன்

தங்கநிற மயிர்கற்றைகளை
கோதியவாறு புறப்படும்
உன் புகார்கள்
இப்பொழுதில்
என் செவி சேர்வதில்லை

பகிரங்கமாய்
அறிவிக்காவிடினும்
சரணடையும்
உன் புலன்களில்
பொறிக்கிறேன்
நீ அறிந்தேயிராத
என் தரப்பை

ஆறாக் காயங்களின் சீழை
மாறின் இடையோடும் உப்பு நீர்
கழுவிச் செல்லுகையில்
பேரிரைச்சலோடு
இளைப்பாறத் துவங்குகிறேன்

...

சாயந்திர நடையில் 

பதிவாக 

தோளமர்ந்து வருகிறது 

ஒரு வண்ணத்துப்பூச்சி 

அரக்கும் 

வெளிர் மஞ்சளும் 

வெள்ளை புள்ளிகளும்

குறுக்கில் சாம்பல் நிற 

கீற்றுகளும்

கொண்டதாய் உள்ள

அழகான 

இவ்வண்ணத்துப்பூச்சிக்கு 

இல்லை 

நிறங்கள் குறித்தான 

அனுமானங்கள் 

....

மழைக் கம்பிகளை
இலகுவாய் பற்றி

வானம் புக

ஆயத்தமாகிறது

சற்று முன்

குளமாய் மாறிய

என் தேகம்

அனக்கங்களற்ற நதி

நானற்று நீ நடந்த
அந்த ஏழாவது அடியில்
பிறக்கிறது
ஓர் அனக்கங்களற்ற நதி

நேற்றிரவு அனிச்சையாய்
படர்ந்தது வரை
நமதான ஸ்பரிசங்கள் யாவும்
இலைகளாய் உருக்கொண்டு
மிதக்கின்றன

ஸ்தம்பித்த மேகங்களின்
கடைசி காதற்துளி
இனி ஏற்படுத்த போவதில்லை
எந்தவொரு அதிர்வையும்
ஏதாவதொரு நீர்த்திவலையையும்

எனினும்
தீர்க்கமாய் தெரிகின்ற
என் பிரதி பிம்பத்தில்
மிக சமீபத்தில்
நீ

:)

x

வலியறியும்

கண்ணீர் உறுஞ்சும்

வெளிரும் காதலறியும் 

தாளாத பிரிவும் புரியும் 

எல்லாம் க்ரஹித்த பின்பும் 

என் அடிவயிற்றை

சிநேகத்தோடு ஸ்பரிசிக்க 

விளைந்திராத

உன் பிஞ்சு பாதங்களுக்கு 

மட்டுமியலும் 

...

கொஞ்சம் அருகிலமர்
தலை கோது
மூக்கில் உரசு
புன்னகை
நான் முத்தமிடுகிறேன்

!

சுயவிரக்கதின் ஜ்வாலை

என் பாதங்களில்

பற்றத் துவங்குகையில்

கசிகிறது

இறப்பின் விசும்பல்கள்

கர்வத்தின் பெருமழை

என் சிரசினின்று

பொழியத் துவங்குகையில்

பீறிடுகிறது

சிருஷ்டியின் பிரவாகம்

முரண்களின்

மொத்தமும்

என்னில்

நான்

பூரணமானவள்

....

நடக்க யத்தனிக்கும்
குழந்தைகள் பறவைகள்
அவர்கள்
அறியாமற் பதிக்கின்ற
ஒவ்வொரு அடியிலும்
பிறக்கிறது
மற்றுமொரு வானம்

:)

விடாது பொழியும்
மழை விட்டுச் செல்லக்கூடும்
வானவில்லை
சிலநேரங்களில்
கவிதையையும்

...

ஒன்றுமிருப்பதில்லை
இந்தபுகைப்படத்தில் ..

அன்றைய அக்காட்சியின்
உயிர்மையில்லை
நிறத்தின் வீரியமில்லை
நாசி நிறைத்த வாசமில்லை
செவியில் ரீங்காரமிட்ட
சப்தங்களில்லை

கேமரா அறியாது
தீண்டிய உன்விரல்களும்
படபடத்த என்னெஞ்சமும்
நினைவில் வருவதுண்டு

யாரோ சிந்திய புன்னகை

வசீகரமானதாயுள்ளது

யாரோ சிந்திய அப்புன்னகை

முகத்தின் குறைகளனைத்தையும்

கொன்று தின்று விட்டு

எவ்வித சலனமுமின்றி

மெல்ல எழும்புகிறது

என் கவனத்தையும் வார்த்தைகளையும்

பறித்த வண்ணம்

அதன் கோரைப்பற்களை

காண்பிக்கத் துவங்குகிறது

அக்கினியை உமிழ ஆயத்தமாகிறது

என்னிடமிருந்த எல்லாமும்

பொசுங்கத் துவங்குகையில்

நினைவு கூர்கிறேன்

புன்னகைக்க மறந்த

தருணங்களை

.....

வெளிறச் செய்யும்

டிராபிக் நெரிசலில் ..

மறவாது எனையழைத்துச் சொன்னாய்

சற்று முன் பொழிந்த

ஆலங்கட்டி மழை குறித்து

அருகிலிருந்தால்
நீ நனைந்திருக்கலாம்

மழைக்காகவோ

உன் அழைப்பிற்காகவோ

எதற்காகவோ

என்னில் பொழிந்த மழையில்

....

எழுத வேண்டும்

எழுதியே தீர வேண்டும்

.............

கதவுகள் திறக்கப்பட்டு

வெளிச்சம் வழியும் அறையில்

தரையில் அமர்ந்தபடி

உன்னுடன் அருந்திய

தேநீர் பற்றி

எதிலோ தொடங்கிய

உரையாடல்

லதா மங்கேஷ்கரில்

மையம் கொண்ட பொழுதில்

தூரத்திலிருந்து பிரயாணித்து வந்த

சாவன் கா மகீனா

பாடல் பற்றியும்

நீ ரசித்துச்சொன்ன

குழந்தை பிராயத்து

குதூகலங்களும்

கோமாளித்தனங்கள்

குறித்தும்

மழைக்காலத்து

மேகங்கள் குறித்தும்

லேசாக நனைக்கும்

சாரல் குறித்தும்

அப்பொழுது

அனிச்சையாய் கோர்த்துகொண்ட

நம் விரல்கள் குறித்தும்

முத்தமிட்டது குறித்தும்

............

எழுத வேண்டும்

எழுதியே தீர வேண்டும்

எனினும்

பின்மழை பொழுதுகளில்

கேட்டு ரசித்த புல்லாங்குழலிசை

காகிதங்களில் வசிப்பதில்லை

...

தேநீர்க் கோப்பையில்
தெரிகிறதென் பிம்பம்

அதுவாக
இருந்திருக்கலாம்
எப்பொழுதேனும்

தெரியாதவை
தெரியாமலே போய்விடும்
அப்பொழுதில்
நிறையத் தெரிவேன்
நிறையத் தெரியாமல்
நான்

....

முத்தம் பற்றிய கவிதைகள் 

பொருளற்று போகிறது 

விரும்பிப் பகிரப்பட்ட 

முத்தத்திடம் 

....

சுகித்து நீ உறங்குகிறாய்
என் விழிகளுக்குள் தூசியாக ...

...

அலைகளை போலானது வாழ்வு
உயரங்களை உச்சி முகர்ந்து
மண்ணுடன் ஆகிறது உறவு ...

பகிர விரும்புகிறேன் ...

காலச்சுவடு மற்றும் வார்த்தை ஆகிய இதழ்களில் எனது கவிதைகள் பிரசுரமாகி உள்ளது .. இதனை உங்களுடன் பகிர்ந்து கொள்வதில் மிகுந்த மகிழ்ச்சி அடைகிறேன் !

http://www.kalachuvadu.com/issue-111/page45.asp
http://www.pksivakumar.blogspot.com/

....

பற்றுதலில் படர்கிறது
உனது காதல்
பற்றப்படுதலில் கசிகிறது
எனது காதல்
நிழல்களில் நகரும்
கோர்க்கப்பட்ட விரல்களில்
பிரித்தாய இயலுவதில்லை
நமக்கான காதலை ...